អាងថាស្គាល់គ្នា បបួលដឹកដើរលេង ដល់កន្លែងស្ងាត់ ប៉ុនប៉ងចាប់រំលោភ តែមិនបានសម្រេច ត្រូវនាងទះកំផ្លៀង ខ្វាចមុខ
22-May-2018 | ដោយ ពលមនសិការ
ព្រះសីហនុ ៖ លោកវរសេនីយ៍ទោភុល ភស្តា អធិការនគរបាលក្រុងព្រះសីហនុ បានឲ្យដឹងថាកាលពីថ្ងៃទី២១ ខែឧសភា ឆ្នាំ២០១៨ នគរបាលក្រុងព្រះសីហនុ បានឃាត់ខ្លួនបុរសម្នាក់ តាមពាក្យបណ្ដឹងរបស់ អ្នកអាណាព្យាបាលខាងស្រី ដែលបានប្តឹងចោទប្រកាន់ ពីបទប៉ុនប៉ងរំលោភសេពសន្ថវៈ កូនរបស់គាត់ តែមិនបានសម្រេច។ ហេតុការណ៍នោះបានកើតឡើងនៅយប់ថ្ងៃទី១៩ ខែឧសភា ឆ្នាំ២០១៨ វេលាម៉ោង២០និង២០នាទី នៅផ្លូវបុរីគុជអាស៊ី ភូមិ១ សង្កាត់លេខ៣ ក្រុង-ខេត្តព្រះសីហនុ។
លោកអធិការនគរបាលក្រុងបានបញ្ជាក់ថាជនជាប់ចោទ ឈ្មោះ លឹម វ៉ាត ភេទប្រុស អាយុ ២៣ឆ្នាំ មុខរបរជាងជួសជុលរថយន្ត បច្ចុប្បន្នស្នាក់នៅក្រុមទី២៣ ភូមិ១ សង្កាត់លេខ៣ ក្រុង-ខេត្តព្រះសីហនុ។ កន្លងមកបានស្គាល់គ្នា ជាមួយនារីម្នាក់ ឈ្មោះមុំ មុន្នីនាថ ភេទស្រី អាយុ២២ឆ្នាំ បម្រើការងារជាបុគ្គលិកសណ្ឋាគារ មានទីលំនៅភូមិ២ សង្កាត់លេខ៤ ក្រុង/ខេត្តព្រះសីហនុ ។
នៅថ្ងៃកើតហេតុ ឈ្មោះលឹម វ៉ាត បានបបួល នារីរងគ្រោះដឹកម៉ូតូដើរកំសាន្ត លុះដល់កន្លែងស្ងាត់ ក្នុងតំបន់បុរីគុជអាស៊ី ឈ្នោះ លឹម វ៉ាត បានចាប់នាងទាំងបង្ខំតែម្តង តែត្រូវនាង រើបម្រាស់ទះកំផ្លៀងមួយដៃ ហើយរត់ចេញ ឈ្មោះវ៉ាត បានរត់តាម ចាប់នាងម្តងទៀត ត្រូវនាងរើបម្រាស់យ៉ាងខ្លាំង ហើយខ្វាចមុខ ព្រមទាំងទាមទារឲ្យជូននាងមកផ្ទះវិញ។ ពេលមកដល់ផ្ទះ នាងបានរៀបរាប់រឿងហេតុ ដែលកើតឡើងប្រាប់ដល់ឪពុកម្ដាយ ទើបអាណាព្យាបាល ទុកពេលឲ្យ២ថ្ងៃឲ្យសាម៉ីខ្លួនចូលមកសុំទោស តែឈ្មោះលឹម វ៉ាតមិនចូលខ្លួន គាត់ក៏សម្រេចចិត្តប្តឹងឲ្យសមត្ថកិច្ច ចាត់ការតាមផ្លូវច្បាប់តែម្តងទៅ។
បច្ចុប្បន្នជនសង្ស័យបានឃាត់ខ្លួននៅអធិការដ្ឋាននគរបាលក្រុងព្រះសីហនុ កសាងសំណុំរឿងបញ្ជូន ទៅការិយាល័យជំនាញ ចាត់ការបន្តតាមនីតិវិធី ៕
ចំនួនអ្នកទស្សនា
- ថ្ងៃនេះ6311
- ម្សិលមិញ9421
- សប្តាហ៍នេះ61971
- ខែនេះ177121
- ឆ្នាំនេះ177121
- សរុប20619577